Psalms 116
Laradi Ne Moroa Ga Lox Asepsu i Basinge Lanmet
1Labalak i tu aleng Leeme Silok, mila neni ing tonga ia, neni i ronga lisingising tarak; 2neni ing tonga ia at levenaleng axap a toro ke ren. 3Loxoxo uu ga suxuna ia, la lainmarat at lamaut ga suxa aumsu ia, la lainbulu eburu mi lodoxoma saasaa ga suxuna axap lorooro rak. 4Melemu aga ro ke at Leeme Silok, “O Leeme Silok, lox asepsu ia.’5Leeme Silok i umsu mi lebelemumu la luvukat; Moroa atdik neni laradi balamu. 6Leeme Silok ik lok tatao nunuan nedi kopmen tevelolos atdi; at laaleng nenia aga ekip tangarang mi laniu, neni ga lox asepsu ia.
7Labalak, una nuunu saga at Leeme Silok, mila Leeme Silok irak lok pam lempanga nunuan tia; 8la neni ga lox asepsu ia basinge lanmet, la luxatli rak basinge lanteng, la luxangkedek tarak basinge laksak saaban; 9kusu abat pas to melamgo at Leeme Silok, to xeneng at lemenemen atnedi di rooro dik lox e. 10Nia aga nuunu saga at Leeme Silok, keke i do aga lox abulubun mumu levenmumuat ga lok do na sep amer ia; 11la keke i do aga marat aleng, la aga lok keretna, “Nia axo epovo kusu ana nuunu saga at teta atla limixin axap di luvuttadi xaxarang.”
12Anaba vorang amlong lununuan at Leeme Silok ik lox i ria xereva? 13Anaba song aurut mo lisintua dan vaen ngan laramtaba ri Leeme Silok, kusu ri tong avukat tin mumu neni ga lox arooro ia. 14Aba lox epovo mo laxakaape rak ti Leeme Silok, to melamgo at lovotpot buru at limixin teren.
15Leeme Silok giba bulu aleng mo do tara at limixin axa ren gi met. 16O Leeme Silok, nenia laradi gugu ram. Nenia anaba lok lugugu ram kerekngan ne naga ga lok lugugu ram. Ugara lox asepsu vam ia basinge lanmet. 17Anaba lok tetaba ti tong avukat tu la ana ro ke at laasen taram. 18Anaba lox epovo laxakaape rak tu ro melamgo at lovotpot buru at limixin taram. 19Anaba lox i na ro at lemelua saparap loogu xaala ram, keneng tinotno at lemenemen Jerusalem.
Ata emi asu mi Leeme Silok.
Copyright information for
MMX